Fibroelastoma dorsi: Utilidade da ecografía no diagnóstico de lesións dermatolóxicas na consulta de medicina de familia

PREMIO AO MELLOR CASO CLÍNICO

Resumo

Muller de 64 anos de idade sen alerxias medicamentosas coñecidas nin hábitos tóxicos. Como antecedentes patolóxicos a paciente padece dislipemia, osteorporose e foi apendicectomizada. Acode a consulta de medicina de familia por vulto en escápula esquerda de dez anos de evolución que, dende hai uns meses, aumentou de tamaño e moléstalle.

Á exploración física non se aprecia lesión ata que a paciente realiza unha antepulsión e aproximación dos ombreiros, momento no que se produce un chasquido e observamos unha tumoración na punta da escápula esquerda, non móbil nin dolorosa á palpación.

Realízase ecografía clínica en consulta, apreciándose unha imaxe de 29x11mm, discretamente hiperecoxénica, de aparencia estriada que non capta doppler.

Coa impresión diagnóstica de fibroelastoma dorsi derívase á paciente ao servizo de cirurxía xeral para valorar exéresis da lesión. Alí, tras solicitar TC de tórax e PAAF que confirma os achados da ecografía, decídese manexo conservador e seguimento.

CONCLUSIÓNS

O fibroelastoma dorsi, tamén chamado elastofibroma dorsi, é un tumor benigno, de crecemento lento, xeralmente asintomático e máis frecuente en mulleres de mediana idade que adoita localizarse entre a parede torácica e o ángulo inferior da escápula. A imaxe ecográfica característica é un patrón de liñas alternantes hipo e hiperecoxénicas, paralelas á parede torácica e que non capta doppler. O diagnóstico diferencial debe realizarse con tumores subcutáneos como lipomas, fibrolipomas, formacións quísticas ou tumores máis agresivos.

Aínda que a gran maioría de lesións de partes brandas que chegan á consulta de medicina de familia son benignas, dispoñer dun ecógrafo é de gran axuda para categorizar a lesión. Os criterios suxestivos de malignidade son:

1. Tamaño maior de 5cm.
2. Marxes infiltrantes ou polilobulados.
3. Crecemento rápido.
4. Localización profunda ou extensión a través da fascia.
5. Fluxo aumentado co Doppler-cor.